Huum deer äädert program stoont

Elin Rosteck

Elin as aw e fååstewål tuläid, nämlik önj Flansborj, di 20. oktoober 1969. Ma en siimoon as taatje as's ål as foom foole ambaitäägen. Grut wörden as's önj Flansborj, önj Kil än aw Fäär, weer's uk snatjer liird heet. Deereefter gäng's tubääg eefter Kil tu studiiren. Heer mååged's uk - mör as tufål - en praktikum bai e NDR 1 Welle Nord. Dåt hååged har, jü bliif erbai. Än nü as's oofting önjt program "Frasch for enarken" önjt råådio tu hiiren. Jü måi hål ålewäägens önjt lönj manschne drååwe än foole foont loonschap siinj. Dåt beest ouers eeftert än bräng arkenån önj har siinjinge näre, wat's belaawed heet. Wan's ai jüst bai tu årben as, mäi's hål bai e siie weese än e hamel bekiike. Unti har foon e haingst üt ordi e win am e uure waie lätje.

Mathias Hölck

Tuläid as Mathias di 10. moi 1973 önj Wyk aw Fäär, sin bjarnetid än jööged ferbroocht'r önj dåt smuk Noorsaarep aw Oomrem, bit'r eefter Hamborj än Kil gäng tu studiiren. Hu iirnge sunt wörden da studänte foont fåch "Friesische Philologie" bai e Uni Kil önjt Landesfunkhaus ambaifjard, deer hätj et aw iinjtooch, huum wälj lust häi än mååg hu frasche råådio-siinjinge. Sunt jü tid as Mathias deerbai. Hi mäi hål ünerwäis weese önj Slaswig-Holsteen än maning nate naie manschne bai sin interviews kånenliire. For ålem natörlik nordfrasche. Än uk, wan´r ai jüst önj tiinjst as bai e NDR 1 Welle Nord än bai sin loonsmååns ambaifrååget, tjucht et ham haane tut wååder. Bai en blucht win mäi´r hål sile, wan't rucht brüsi as, namt´r liiwer et surfbord.

Et Nordfriisk Instituut

Bai üüsen weedstrid "Ferteel iinjsen!" än bait apbagen foon daheere internetside stoont üs et Nordfriisk Instituut as partner än ma-organisååtor aw åle möölike wise tu side. 1965 wörd et grünläid. Sunt jütid kumerd et ham as jü sentråål waasenschaplik inruchting am plääg, stipe än ütforschen foon e frasche spräke, histoori än kultuur. Et Instituut wårt dräägen foon e Feriin Nordfriisk Instituut mä amenbai 850 lasmoote; sin årbe betåålt di feriin for ålem döör stipe foont lönj Slaswig-Holsteen, foon e Kris Nordfraschlönj än foon e dånsch manerhäid. Deertu kaame da baidreeginge foon e lasmoote, spände än e ferkuup foon böke. Et Nordfriisk Instituut heet bit nü mååst triihunert böke än häfte am e spräke, kultuur än histoori foon Nordfraschlönj ütdänj, maning deerfoon aw friisk.